Archivu de la categoría ‘Ximiélgame’

Zarramos Ximiélgame (otra vuelta)

14 de Xunu de 2013 por Ximiélgame

zarramos

Como ya veníemos anunciando dende hai un mes nes cuentes oficiales en Ximiélgame, Twitter y la páxina de Facebook, mañana daremos acabación a la rede Ximiélgame. Desaniciaremos tolos usuarios, los datos y publicaciones feches.

Los motivos son principalmente l’abandonu del desendolcu de nueves funcionalidaes pola nuesa parte, algo que fae que’l usu seya anguaño cuasi nulu. Esto sumáu a que nun tenemos ganes de tirar por ello y que nos supón un gastu mantenelu, ye poco pero preferimos gastalo en chigre, llévanos a tomar esta decisión.

Anque zarremos ye con un bon tastiu, prestónos munchu xugar con esto, sobremanera la étapa de beta privada con tol sofitu de los blogueros y la xente de Softastur.

Ximiélgame marcha con 2.529 usuarios rexistraos, 9.652 mensaxes nel telégrafu y 4.587 mensaxes privaos, inda tamos baxando’l log del sirvidor pa saber cuantes visites tuvo, la verdá ye que nunca lo miramos cuando lo sepamos editaremos esta entrada.

Si alguien tien un proyeutu interesante, n’asturianu y llibre, y quier el dominiu tresferímoslu ensin problema.

Gracies a toos…

Novedaes en Ximiélgame

30 de Xunetu de 2010 por Ximiélgame

Los que dende les 00:00 hores a les 20:00 de güei intentasteis entrar en Ximiélga.me, veriais que la páxina tuvo zarrada. El motivu foi una actualización y renovación profunda del sistema, y l’entamu de les primeres pruebes del API.

L’API (del inglés interfaz de programación d’aplicaciones) permitirá a terceros desendolcar aplicaciones que permitan interactuar con Ximiélga.me ensin que l’usuariu tenga que entrar nel sitiu. Esto ye mui útil pa coses como que un blogue o páxina web mande a la so cuenta en Ximiélgame un enllaz del artículu que t’acabante d’espublizar, o aplicaciones d’escritoriu como gwibber. Más alantre espublizaremos otru artículu más detalláu y facilitaremos llibreríes pal desendolcu d’aplicaciones pal API.

Aprovechamos el parón de güei tamién pa dar la posibilidá de que los mensaxes del telégrafu seyan públicos, si dientru de les opciones de privacidá esbillamos “Públicu”, podrán siguinos los mensaxes del telegrafu persones que nun ten rexistraes.

Otru cambeo importante ye la primer versión en francés de Ximiélgame, que pasa a ser el cuartu idioma qu’ufrimos xunto col asturianu, inglés y castellanu, sicasí inda nun ye una versión final y ta incompleta, poro cunta con un 85% de los mensaxes tornaos. Esta versión ye gracies al trabayu del equipu d’Elgg.fr

Gracies pola paciencia durante estes hores.

INPORTANTE PA LOS USUARIOS DE TWITTER: Dientru de la reorganización que ficimos en ximiélgame, axustamos el preseo que permite coneutanos con twitter pa unviar los mensaxes del telégrafu. Pa poder siguir usandolo teneis de configuralu otra vuelta na páxina de configuración: http://ximielga.me/pg/settings/plugins/

Sistema nuevu d’integración con Twitter

30 d'Abril de 2010 por Ximiélgame

Por mor de cambeos fechos nel API de twitter, tamos acabantes d’anovar el sistema pa unviar mensaxes dende El Telégrafu a Twitter. Aprovechamos pa dixebrar les opciones d’identi.ca y de twitter pa poder unviar a los dos servicios al mesmu tiempu.

Los usuarios d’identi.ca nun tienen que facer nada, pero los que useis twitter teneis d’aceptar la aplicación de Ximiélgame en twitter dende la configuración de preseos.

A nivel técnicu esti API nuevu de twitter fai usu del protocolu oauth, que ye más seguru pal usuariu porque nun tien necesidá de compartir la clave, y pal proveedor que aforra tener que guardales.

Mañana entama la beta pública

18 de Marzu de 2010 por Ximiélgame

… o lo que ye lo mesmo, quedará abiertu el rexistru d’usuarios nuevos.

Si too va bien a lo llargu de mañana vienres tendremos preparáu Ximiélga.me pa entamar a usalo de verdá… sicasí seguimos en fase de pruebes, polo que cualesquier fallu que veais podreis siguir unviandolos al grupu Ximiélgame.

Primer actualización importante

17 de Marzu de 2010 por Ximiélgame

Tamos acabantes de facer cambeos importantes en Ximiélga.me de cara a la fase beta pública.

Dientro d’estos cambeos ta el descarte del sistema de mensaxería instantaneo ente collacios coneutaos. La esplicación ta na enorme carga que supón pal sirvidor les consultes d’estáu constantes.

La idea ye facer una sala de chat global pa la web, colo que el sistema nun tien de facer tantes consultes, sicasí les charres serán públiques a tolos usuarios coneutaos al sistema, pensamos que col sistema de mensaxería interno cúbrese la necesidá de facer comentarios individuales.

Ente los cambeos “visibles” qu’inclui esta versión nueva ta:

  • Integración de recaptcha nos formularios de rexistru, conexón y recordatoriu de clave.
  • Imáxenes d’usuariu más pequeñes nel tableru d’actividá pa una carga más rápida.
  • Nuevu y meyor sistema de busca dientru del sitiu.

Amás d’estos cambeos evidentes, implementamos otres meyores:

  • Primer alpha del API pa poder trabayar con Ximiélga.me dende aplicaciones esternes
  • Sistema de traducción online del sitiu (restrinxíu a traductores) de momentu con soporte pa castellanu, gallegu y portugués.
  • Nueva estructura de carpetes pal agospiamientu de ficheros.

Mañana esperamos sacar tiempu pa dalguna novedá más, sicasí yá nun tendremos falta de zarrar la páxina al tar los cambeos importantes fechos.

Gracies pola paciencia de les últimes 20 hores.

Cambiamos de dominiu

4 de Marzu de 2010 por Ximiélgame

Nel sidra y blogues del pasáu febreru, Pingarates comentónos que porque nun rexistrábemos ximielga.me, así escribiríemos menos amás de ser más prestosu (aka cool). La verdá ye que nin conocíemos el .me (que corresponde a Montenegru).

Pero prestónos la idea enforma, y fechu… agora Ximiĺegame ye ximielga.me (ximielgame.net seguirá operativu)

Coneutar Ximiélgame con indenti.ca, Facebook y Twitter

12 de Xineru de 2010 por Ximiélgame

Tamos trabayando pa poder espublizar los mensaxes del Telégrafu de Ximiélgame nel wall de Facebook, si nun quies esperar y yes usuariu d’identi.ca puedes usar les conexones d’esti serviciu de microbloggin (que amás ye Software Llibre) pa unviar dende Ximiélgame a toos estos servicios.

Lo primero ye configurar la to cuenta de Ximiélgame pa que mande los mensaxes del Telégrafu a identi.ca, ten encuenta que namás que van mandase los mensaxes que tengas configuraos como públicos, esto puedes facelu editando’l widget del telegráfu del to perfil.

Vamos a “Configuración>Configurar los tos preseos” y na estaya “Serviciu de microblogging” ponemos el nome d’usuariu y clave d’indenti.ca, marcamos el serviciu y escoyemos “Si” na opción d’unviar los mensaxes. Cuando te too llistu guardamos y tolos mensaxes públicos qu’espublices en Telégrafu saldrán na to cuenta d’identi.ca.

iden_01

Agora entramos n’identi.ca y na opción “Conectarse” vermos dos llingüetes, una pa Twitter y otra pa Facebook onde podremos coneutar con estos servicios y configuralos pa unviar tolos mensaxes d’identi.ca.  Nel casu de Facebook tendrás d’instalar l’aplicación pa identi.ca.

iden_02

Si namás que uses Twitter, puedes coneutar Ximiélgame igual que con identi.ca y si namás que ueses Facebook, en unos díes podrás coneutalu direutamente dende Ximiélgame… esti artículu ta dirixíu a los usuarios impacientes 😉 y a los que usen los tres servicios.

Serviciu de microblogging

¿Tienes un blogue n’asturianu?… pide la to cuenta en Ximiélgame

10 de Xineru de 2010 por Ximiélgame

Aprovechando les votaciones a meyor blogue n’asturianu abrimos les primer invitaciones pa probar Ximiélgame.

Inda ta en desendolcu polo que ta cambiando a cada pocu, l’aida de los usuarios ye fundamental pa la meyora del sistema.

¿Cómo puedes solicitar la cuenta?

Si tienes un blogue n’asturianu y yá votaste pol meyor blogue 2009 namás que tienes de rellenar esti formulariu pa pedir la to cuenta en Ximiélgame. Comprobarémos si los datos que nos apurres concasen y recibirás un corréu cola confirmación.

Namás que daremos una cuenta por blogue.

Namás que tendremos en cuenta los blogues qu’aparecen llistaos como “Blogues que yá votaron” en http://www.votalmeyorblogue.webcindario.com/

Integración con acurti.es y gravatar

4 de Xineru de 2010 por Ximiélgame

AVISU: ESTI ARTÍCULU CONTIÉN INFORMACIÓN TÉCNICA D’INTERÉS PA USUARIOS AVANZAOS Y DESENDOLCADORES DE PÁXINES WEB.

Tamos acabantes d’integrar Gravatar en Ximiélgame, los usuarios de gravatar amosarán nel perfil de Ximiélgame la imaxe asociada’l so corréu en gravatar. Sicasí podrán xubir otra imaxe disitinta pa Ximiélgame. 

“El telégrafu”, serviciu de microblogging de ximiélgame, agora ufre la posibilidá d’usar acurti.es pa enxertar enllaces. Pudimos facelo gracies al API qu’implementó AluminiuM nel serviciu que mantiene, sicasí pa facer más cómodu l’usu d’acurti.es en Ximiélgame quiximos facelo con ajax, y pa esto el API d’acurti.es (igual que’l de tinyurl) ye un pelín llimitao, polo que ficimos un script pa devolver les URL “acurtiaes” con formatu JSON. El usu ye enforma simple y tienes dos opciones d’usu:

http://altuxa.com/apps/json-acurties.php?url=http://google.es

http://altuxa.com/apps/json-acurties.php?url=http://google.es&callback=exemplu

Con estos dos yá son cuatro los servicios esternos integraos con Ximiélgame, que sumense a identi.ca y twitter.

Presentamos… Ximielgame.net (otra vuelta)

19 d'Avientu de 2009 por Ximiélgame

Yá que teniemos el dominiu rexistráu, decidimos usalu pa otru proyeutu…

¿Qué ye Ximiélgame? vien a ser lo que se conoz por una “rede social”, pero claro esto pueden ser munches coses:

Ye un llugar onde podrás comunicate colos tos collacios, al estilu de Facebook, pero tamién inclui un sistema de “microbloging” al estilu de Twitter y too esto n’asturianu.

¿Ye un sustitutu asturianu de Facebook, identi.ca, Twitter, etc…? Non, más bien ye un complementu, por eso tamos trabayando na integración del sistema colos servicios nomaos pa que seya más fácil interactuar con ellos dende Ximiélgame o hacia Ximiélgame.

Anguaño tamos en una fase de beta privada, lo que vien a ser que tamos faciendo pruebes y de momentu nun hai posibilidá de rexistru, sacante los usuarios convidaos a probar el sistema.

Indudablemente esti proyeutu lleva munchu trabayu y nun sería posible ensin contar col trabayu, apoyu y esfuerzu de los compañeros de Softastur.